23-05-2025

ADEGA celebra 50 anos de loita ecoloxista cun gran festival en Lugo

A Asociación para a Defensa Ecolóxica de Galiza (ADEGA) celebra neste 2025 os seus 50 anos de loita e compromiso coa defensa da terra e do medio ambiente galego. Para conmemorar esta data, a entidade organiza un gran festival o sábado, 7 de xuño, no Pazo de Feiras e Congresos de Lugo, baixo o nome de "ADEGA, 50 anos coidando a terra". 

Froilán Pallín, secretario xeral de ADEGA, xunto cos deputados Daniel García e Iria Castro, das áreas de Medio Rural e Cultura respectivamente, así como Tareixa Antía Ferreiro Tallón, en representación da Área de Cultura do Concello de Lugo, presentaron hoxe o festival perante os medios no Salón de Actos da Deputación de Lugo, onde fixeron un chamamento a participar desta festa do ecoloxismo galego que se desenvolverá durante todo o día no Pazo de Feiras e Congresos e no parque do río Miño. Pensado para todos os públicos, esta xornada combinará unha ampla feira de produtos agro, ecolóxicos, de artesanía e de colectivos, xunto con mesas redondas, xogos tradicionais, proxección documental, encontro solar e concertos ata a madrugada, entre eles, de Loita Amada, Filophóbicas ou Catro nun zoco. ADEGA quere así compartir este aniversario con toda a cidadanía e celebrar a histórica loita colectiva por unha Galiza máis xusta e sustentable.

Feira, encontro solar e actividades para todas as idades

Ás 11:00 horas dará comezo a xornada coa apertura da feira de produtos do agro e artesanía no interior do Pazo de Feiras, onde tamén estarán presentes asociacións, librarías e antigüidades. Poderanse adquirir produtos de horta, mel e derivados, conservas, cosmética natural, cerámica, cestería, libros e moito máis. Calquera produtora está aínda a tempo de reservar o seu espazo na feira a través deste formulario.

Á mesma hora comezará no Parque do río Miño o encontro solar, unha actividade para dar a coñecer as posibilidades de cociñar coa enerxía ilimitada do sol sen necesidade de electricidade ou outro combustible fósil. ADEGA convida a todas as persoas interesadas a traer as súas cociñas solares para facer o xantar e compartir receitas e saberes. Ao mediodía terá lugar unha romaría popular no parque do Miño, á que cadaquén pode levar a súa propia comida, aínda que tamén haberá postos e servizo de comida no interior do Pazo.

As crianzas terán espazo propio durante todo o día, con actividades e xogos tradicionais da man de XOTRAMU no Parque do Miño e coa música de Uxía Lambona e a Banda Molona e do Proxecto Troupelear, da man de Branca Villares e Pablo Pintor.

Espazos para a reflexión ecoloxista: mesas redondas e documental

Ademais, na sala Río Miño do Pazo de Feiras desenvolveranse dúas mesas redondas: “ADEGA: 50 anos coidando a terra” (12:30h), coa participación de persoas que estiveron na fundación da asociación e foron protagonistas de moitas loitas ecoloxistas; e “A loita continúa: as principais ameazas de hoxe” (16:30h), onde diferentes membros de ADEGA abordarán os retos actuais e a futuro das loitas ecoloxistas en Galiza.

O documental “A terra por gañar” presentarase e proxectarase en primicia ás 11:30 h. na Sala Río Miño do Pazo de Feiras. Esta peza percorre a historia da organización desde a súa fundación en 1974 e analiza o impacto do ecoloxismo galego ao longo do tempo. Unha reflexión indispensable para comprender a Galiza que habitamos, recoñecer o legado de ADEGA e das persoas que puxeron o corpo na protección da Terra e revisar o papel dun movemento ecoloxista que afronta agora novas e complexas problemáticas ambientais nunha das chamadas “zonas de sacrificio”.

Música ata a madrugada

A música será protagonista durante toda a xornada, con concertos desde a mañá ata a noite. O cartel inclúe a actuación de Branca Villares e Pablo Pintor co seu Proxecto Troupelear (12:00h, parque do río Miño), e de grupos como Axeigo (que amenizará a romaría desde as 13:30h), Uxía Lambona e a Banda Molona (17:00h), Caivanca (19:00h), Catro nun zoco (20:30h), Filophóbicas (22:00h) e Loita Amada (23:30h), que poñerá o broche final á xornada. Todos estes grupos actuarán no Pazo de Feiras e Congresos, a excepción do Proxecto Troupelear e de Axeigo, que estarán no parque do río Miño.

Este festival conta coa colaboración das áreas de Medio Rural, do Mar e Mocidade, e de Cultura, Patrimonio Histórico Artístico e Normalización Lingüística da Deputación de Lugo, así como a área de Cultura, Turismo e Promoción da Lingua do Concello de Lugo.

Programa completo

Pazo de Feiras e Congresos e Parque do Río Miño – Sábado, 7 de xuño

• 11:00h* – Apertura da feira de produtos do agro, de artesanía e asociacións (Pazo de Feiras)
• 11:00h** – Encontro solar (Parque do río Miño)
• 11:30h – Presentación e proxección do documental "A terra por gañar" (Sala Río Miño. Pazo de Feiras)
• 12:00 h* - Xogos tradicionais a cargo de Xotramu (Parque do río Miño)
• 12:00h – Actuación Proxecto Troupelear(Branca Villares e Pablo Pintor)(Parque dorío Miño)
• 12:30 h -Mesa redonda“ADEGA, 50 anos coidando a Terra” (Sala Río Miño. Pazo de Feiras)
• 13:30h – Actuación Axeigo (Parque do río Miño)
• 14:30h – Romaría (Parque do río Miño)
• 16:30h – Mesa redonda "A loita continúa: as principais ameazas de hoxe" (Sala Río Miño. Pazo de Feiras)
• 17:00h – Concerto Uxía Lambona e a Banda Molona (Pazo de Feiras)
• 19:00h – Concerto Caivanca (Parque do río Miño)
• 20:30h – Concerto Catro nun zoco (Pazo de Feiras)
• 22:00h – Concerto Filophóbicas (Pazo de Feiras)
• 23:30h – Concerto Loita Amada (Pazo de Feiras)

* Durante toda a xornada a partir da hora indicada.
** A partir da hora indicada ata as 17h.

En caso de choiva, todas as actividades desenvolveranse no interior do Pazo de Feiras.