Inicio / Novas / ADEGA Nacional / As xornadas de compostaxe de Lugo amosan a...
30-11-2015
Esta pasada fin de semana ADEGA organizou xunto coa Deputación de Lugo unha palestra para expoñer a realidade actual dos sistemas de aproveitamento da materia orgánica dos residuos mediante a compostaxe. Son proxectos e experiencias, algunhas novidosas en Galiza, como o "porta a porta" rural de San Sadurniño e outras xa con anos de rodaxe tanto no noso país como noutras partes de Europa.
Con esta inciativa, ADEGA e a área de medio ambiente da Deputación de Lugo queremos animar aos concellos, mancomunidades e deputacións a poñer en marcha proxectos de compostaxe, ben sexa domiciliaria, comunitaria ou en pequenas plantas, coa idea de aproveitarmnos este valioso recurso -a materia orgánica dos residuos- e evitar que sexa incinerada ou vertida como acontece en SOGAMA. De paso, e cos diversos sistemas para aproveitar este elemento e convertilo en compost, os concellos aforran cartos e contribúen a loitar contra o cambio climático, devolverlle a fertilidade á terra e aos montes, pechar ciclos produtivos nas áreas rurais... en definitiva, beneficiar á cidadanía e ao medio ambiente.
Sobre a actualidade e as novidades dos diferentes proxectos baseados na compostaxe en Europa, o estado e Galiza falou Ramón Plana, mestre compostador e experto no deseño e posta en marcha de iniciativas ecolóxica spara a xestión dos biorresiduos.
De seguido, nunha mesa redonda puidemos coñecer a evolución de proxectos tan novidosos como o "porta a porta" rural nun núcleo de San Sadurniño, presentado polo seu alcalde, Secundino García.
Os resultados dos proxectos de Carballo (área de compostaxe e horto escolar contiguo) e Allariz (compostaxe caseira, áreas de compostaxe comunitaria e compostaxe en planta) foron expostos respeitivamente por Lois Lamas, concelleiro de obras e servizos de Carballo e Bernardo Varela, concelleiro de medio ambiente de Allariz.
Completou a mesa Joseba Sánchez, técnico da empresa Navarra Vermican, que amosou os resultados das distintas experiencias desenvoltas en Nafarroa e Euskal Herria, e que están a acadar arestora os níveis de reciclaxe fixados pola Directiva para 2020!
Puidemos coñecer tamén a realidade dos moitos proxectos que se están a desenvolver en Catalunya através dunha videoconferenza con Gemma Nohales, da Agència de Ecologia Urbana de Barcelona, que fixo especial fincapé no éxito dos sistemas "porta a porta".
Na mesa redonda do serán, coñecimos máis inciativas e proxectos como os desenvolvidos coa materia orgánica dos comedores escolares da UDC (Universidade da Coruña), a cargo de María R. Lafuente, técnica de ADEGA; e a investigación en compostaxe de algas e restos de peixes desenvolvida no campus de Lugo da USC por Marta Illera e obxecto da súa tese de doutoramento. Finalmente, Gregorio López, tésnico de parques e xardíns de Compostela amosounos o xa veterano proxecto de compostaxe con restos d epoda e xardín das moitas zonas verdes de Santiago e que permitíu un aforro de cartos, materiais e agroquímicos no mantemento dos espazos verdes da cidade.
As xornadas remataron o sábado 28 con senllas visitas á planta de compostaxe e tratamento de RSUs da Mancomunidade de Concellos Serra do Barbanza, guiada pola tésnica Marta Domínguez, e á experiencia de ciclo pechado de materia orgánica (da horra ao prato, de aí aos composteiros e á horta) que leva adiante dende hai uns anos o Fogar do Santiso, coñecida casa de xantar no concello de Teo.
A todos e todas as intervintes e participantes, moitas grazas!
Ramón Plana: NOVIDADES NA XESTIÓN DE RESIDUOS
Lois Lamas: COMPOSTAXE NO HORTO INFANTIL DE CARBALLO
Joseba Sánchez (Vermican): COMPOSTAXE COMUNITARIA EN NAVARRA
Gemma Nohales: ESTRATEXIAS E MODELOS DE XESTIÓN DE BIORRESIDUOS
María R. Lafuente: COMPOSTAXE NOS COMEDORES UNIVERSITARIOS DA UDC
Marta Illera: COMPOSTAXE DE ALGAS E RESTOS DE PEIXES
ÁLBUM de fotos das xornadas
ADEGA / Asociación para a defensa ecolóxica de Galiza
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email: adega@adega.gal