Lugo, a 31 de xullo de 2012. No Pleno da Deputación de Lugo de hoxe foi aprobada por unanimidade unha moción do Bloque Nacionalista Galego na que se pide que a Deputación Provincial traslade á Xunta a solicitude formal de que a Cova de Eirós de Triacastela sexa declarada como Ben de Interese Cultural. Á súa vez, todos os grupos con representación política na Deputación foron instados por ADEGA e a Asociación sociocultural de O Iribio a posicionarse ao respecto da máxima protección patrimonial legal deste xacemento paleolítico. Ambos os dous colectivos xa pediran a declaración de BIC para a Cova de Eirós en xullo de 2009 e, de novo, en maio deste ano diante da Dirección Xeral de Patrimonio Cultural sen, polo de agora, obter resposta por parte deste departamento da Xunta.

Lugo, 10 de xullo de 2012. O xoves dia 5 de Xullo do 2012 pasará á historia despois de que o Ministerio de Medio Ambiente publicase no boletín Oficial do Estado a declaración de impacto ambiental negativa do encoro no río Navia, promovida por Saltos del Navia (sociedade ao 50% de Endesa e Hidrocantábrico) desde 1951. Este foi o oitavo intento da promotora de desenvolver esta concesión franquista na mesma ubicación e cuxa tramitación comezou en 2007. Nas demais ocasións (1951, 1956, 1964, 1975, 1976, 1985, 1995) a oposición social tamén foi frontal, o que conseguiu impedir a execución da presa. Desde ADEGA reclamamos que se evite un novo intento da promotora de desenvolver o proxecto e máis agresións para a comarca, declarando a caducidade desta concesión franquista.

Lugo, a 19 de xullo de 2012. Con motivo de se cumpriren dous anos da súa constitución, o Foro do Camiño Primitivo, do que fai parte ADEGA, celebrou unha asemblea xeral para analizar a evolución do estado de conservación e protección desta milenaria calzada medieval. Malia a que hai dous anos o Foro xa alertaba á Xunta de Galiza da necesidade urxente de proceder á delimitación oficial deste primeiro camiño de peregrinación a Compostela, os membros do Foro veñen de constatar que desde aquela a Xunta aínda non deu ningún paso cara a esa dirección, permitindo que o Camiño Primitivo siga a sufrir un elevado grao de ameaza ambiental e de agresión ao seu patrimonio cultural. Así mesmo, esixe como principios irrenunciábeis na delimitación da vía a autenticidade histórica, a recuperación da súa traza antiga e a protección de ámbito BIC (Ben de Interese Cultural).

Lugo, a 13 de xullo de 2012. Desde o Foro do Camiño Primitivo, plataforma constituída hai dous anos e da que forma parte ADEGA e outras 26 asociacións e personalidades significadas polo seu compromiso no estudo, recuperación, defensa e promoción da primeira vía de peregrinación a Compostela,  denunciamos un novo atropelo contra o patrimonio asociado á vía histórica. Manifestamos o noso pesar e indignación pola recente destrución do coñecido como FORNO DE VALERIANO, situado no lugar máis emblemático do Camiño Primitivo na vila de Fonsagrada, fronte a "Fonte Sacra". A día de hoxe non queda ningún vestixio deste elemento único na vía primitiva. O Foro pide responsabilidades e amosa a súa indignación ante estas agresións, sobre todo, cando se está a tramitar a declaración de Patrimonio Mundial do Camiño Primitivo.