Do 03-02-2026 ao 11-02-2026

Oferta de Emprego | Queres formar parte da nosa equipa?

ADEGA ofrece un posto de traballo para coordinar a actividade da delegación da entidade na provincia de Lugo e apoiar á directiva local nas tarefas administrativas, organizativas e de representación.

Funcións do posto

1. Organización e coordinación

• Coordinación do traballo diario da delegación.
• Atención ás persoas socias, colaboradoras e público interesado.
• Organización de actos, actividades e accións divulgativas.
• Interlocución coa estrutura nacional da entidade.

2. Xestión técnico-administrativa

• Tramitación e seguimento de subvencións públicas.
• Elaboración e presentación de solicitudes, denuncias e alegacións ante a Administración pública. 
• Apoio á tesourería: rexistro contable, xestión de pagos, contratacións e control documental.
• Arquivo, custodia e actualización da documentación da delegación.

3. Comunicación e divulgación

• Elaboración e difusión de comunicacións e boletíns internos.
• Redacción de notas de prensa e actualización de contidos en web e redes sociais.
• Impartición de charlas, presentacións e accións formativas.
• Deseño de cartaces e outros materiais divulgativos.

Requisitos das persoas candidatas

Formación e coñecementos

• Titulación universitaria: grao, licenciatura ou diplomatura.
• Estudos relacionados con algún dos seguintes ámbitos: xestión, administración e/ou dirección de entidades, ciencias naturais ou da terra, divulgación/comunicación, dereito, educación ambiental.
• Manexo solvente de ferramentas ofimáticas (Word, Excel, PowerPoint ou similares).
• Nivel alto de galego, tanto oral como escrito.
• Permiso de conducir.

 Valorarase especialmente

• Interese activo polo medio ambiente e a cultura, acreditable a través de formación, participación en actividades, voluntariado ou outras experiencias relacionadas.
• Experiencia ou colaboración previa con organizacións sociais, ecoloxistas ou culturais que dote dun coñecemento práctico do tecido asociativo.
• Manexo de sistemas de información xeográfica en tarefas de análise e documentación.

Condicións laborais

• Incorporación inmediata.
• Contrato indefinido cun mes en período de proba.
• Xornada de 30 horas semanais (6 horas diarias).
• Horario continuo de mañá (suxeito a cláusula de flexibilidade)
• Lugar de traballo: local de ADEGA na cidade de Lugo (Ronda das Fontiñas, 180 Ent.)
• Salario base mensual: 1.200 euros

Como presentar a candidatura?

Envía o teu currículo ao enderezo electrónico adegalugo@adega.gal, indicando no asunto “Candidatura a posto de traballo ADEGA-Lugo”. O prazo permanecerá aberto ata o mércores, 11 de febreiro de 2026 (incluído). 

Grazas pola túa atención.