Potencial para o aforro de auga na vivenda

Manuel Soto

Realizar unha auditoría da auga no fogar é unha actividade moi recomendábel para descubrir numerosas oportunidades de aforro da auga e achegar o noso grao de area á protección da natureza e tamén a un estilo de vida máis sustentábel. Neste traballo presentamos algúns dos resultados acadados nun elevado número de auditorías realizadas en diversas materias da Universidade da Coruña. A nivel social, o programa Fogares Verdes que combina a concienciación e o aforro de auga e enerxía, xunto coa prevención da xeración de residuos e a recollida separada, deberían ser unha prioridade.

Emapic: cartografía participativa ao servizo da cidadanía

Fco. Alberto Varela García e Daniel Veira Ferrín

Páx. 28-29

Emapic é un proxecto asociado ao Laboratorio CartoLab da Universidade da Coruña que permite xestionar información ou opinión distribuída sobre un mapa, de forma sinxela e inmediata. As súas funcionalidades van máis alá dunha ferramenta en código aberto para a creación de enquisas online, pois é unha aplicación de representación cartográfica de datos xerados en procesos colaborativos de participación cidadá. Calquera tipo de dato facilitado por participantes vía navegadores web ou móbil pode ser rexistrado para ser de utilidade en calquera ámbito de análise, investigación e xestión urbana ou territorial.

Cambio climático: como desenvolvernos sen crecemento económico?

Emilio Fernández Suárez, por Cerna/Redacción

Páx. 30-32

O Cambio Climático é probabelmente o maior problema ao que se enfronta a Humanidade, a nosa especie; porén, unha grande parte da poboación mundial aínda descoñece as súas causas e consecuencias. O pasado 6 de marzo, o Catedrático en Ecoloxía da Universidade de Vigo, Emilio Fernández Suárez acudía ao centro universitario de Riazor da Coruña, convidado pola Oficina de Medio ambiente da Universidade (OMA), coa coloboración da Fundación Alcoa, para explicar de xeito ameno e sinxelo os retos aos que nos enfronta este fenómenode grande complexidade. A continuación, facemos un resumo do seu relatorio, titulado “Cambio Climático: un desafío global e local”.

Catro anos de seguimento do leirón cinsento no Parque Natural O Invernadoiro

Xosé Pardavila, Ramsés Pérez, Adrián Lamosa e Lucía Parente

Páx. 33-35

No ano 2014, ADEGA e Sorex puxeron en marcha un proxecto de seguimento do leirón cinsento (Glis glis) no Parque Natural O Invernadoiro (Ourense) coa finalidade de facer un estudo da especie neste espazo natural. Os resultado do estudo, a día de hoxe, demostran a eficacia da colocación de caixas aniñadoiras.

A custodia do territorio nas Insuas do Miño e os Ollos de Begonte

Martiño Cabana, Roberto Hermida e Óscar Rivas

Páx. 36-39

A Custodia do Territorio móstrase como unha ferramenta eficaz para mellorar o estado de conservación dos espazos naturais de Galicia. Neste artigo, mostramos os traballos realizados nas Insuas do Miño e os Ollos de Begonte, situados no LIC Parga-Ladra-Támoga e na Reserva da Biosfera de Terras do Miño. A xestión do territorio, a investigación e a divulgación dos valores ambientais da zona son os pilares nos que se finca o proxecto.

De vagalume a vaga de lume e a lingua de ovella

Xosé Salvadores e Marga Miguens

Páx. 40-41

Na sección de fauna de Cerna 79, Xosé Salvadores traslada o seu imaxinario sobre o verán, a chegada das aves e outros animais que son propios da estación. Marga Miguens, desta volta, dedica o apartado de flora galega á lingua de ovella (Plantago lanceolata).