Inicio / Números anteriores / CERNA Nº 57 - Transporte: O...
Artigos da revista CERNA Nº 57
A crise económica e o medio ambiente: Ameaza ou oportunidade?
María Xosé Vázquez Rodríguez
Páx. 24 - 25
Entre os múltiples efectos da actual crise económica, ten interese reflexionar sobre as consecuencias que pode ter sobre o medio ambiente, especialmente pola complexidade das relacións entre crecemento económico e o seu impacto ambiental, e pola influencia que nesta relación teñen as decisións que as Administracións públicas adoptan para facerlle fronte ao problema. A resposta á pregunta inicial deste artigo dependerá en gran medida da aposta que fagan os diferentes gobernos, especialmente os europeos e o estadounidense, que están funcionando como referencia internacionais.
Eixo Atlántico Ferroviario: o tren de proximidade é posíbel
Xosé Carlos Fernández
Páx. 26 - 28
Galiza é un territorio que conta con moito capital invertido en infraestruturas ferroviarias, que nun principio servía para a comunicación entre as grandes cidades galegas (do que tamén se aproveitaban os pobos polos que pasaban as vías), e estas a súa vez cos grandes centros do Estado. Actualmente, os servizos que unen os pobos cos cidades están a desaparecer pola construción da Liña de Alta Velocidade, condenando o que se coñece como servizo de cercanías. Mostra disto é o exemplo do Eixo Atlántico entre A Coruña e Vigo.
Plan galego de acción fronte ao cambio climático 2008-2012
Emilio M. Fernández Suárez
Páx. 31 - 33
O Plan galego de Acción fronte ao Cambio Climático (PGACC), constitúe a contribución de Galicia ao cumprimento dos compromisos adquiridos polo Estado español no ámbito do Protocolo de Quioto. O PGACC sitúa a Galicia entre as Comunidades Autónomas máis avanzadas na posta en marcha de accións contra este fenómeno global, xunto ao País Vasco, Cataluña e Andalucía que xa aprobaron os seus correspondentes plans de acción. A elaboración do PGACC é froito do traballo conxunto de todos os departamentos da Xunta de Galicia baixo a coordinación da Dirección Xeral de Desenvolvemento Sostíbel pertencente á Consellaría de Medio Ambiente e Desenvolvemento Sostíbel.
Uso da Enerxía Solar na UDC
Xesús Giz
Páx. 34 - 36
As instalacións solares fotovoltaicas permiten a xeración enerxética distribuída. A posíbel localización dos paneis en cuberta, o potencial para a electrificación de lugares onde non chega a rede eléctrica, e a lonxevidade dos paneis fotovoltaicos son quizais os parámetros máis salientábeis desta tecnoloxía. A Universidade da Coruña (UDC) conta cunha instalación fotovoltaica de 7,5 kW no Centro de Investigación en Tecnoloxías da Información e das Comunicacións (CITIC), en Elviña (A Coruña), e outras instalacións en fase de proxecto.
Núcleos piloto de sostibilidade, “Progresan Adecuadamente”
Belén Rodríguez
Páx. 38 - 40
Foi no Cumio da Terra de Río de Janeiro onde se acadou o convencemento de que o modelo de desenvolvemento adpotado ata o momento polas cidades tiña que mudar cara a sostibilidade, é dicir, cara a outro modelo que conseguise preservar os recursos naturais sen prexudicar o desenvolvemento social e económico. O equilibrio de intereses entre estes tres factores, ambiental, económico e social está a ser o grande reto das actuais políticas sectoriais e globais do planeta. A Dirección Xeral de Desenvolvemento Sostíbel da Consellería de Medio Ambiente é a encargada, no ámbito galego, de levar a cabo decisións e tomar medidas encamiñadas á consecución deste grande reto. Unha das medidas xa postas en marcha en Galiza desde o 2006 e que intenta trasladar ao eido local as premisas de carácter global foi a creación dos núcleos de sostibilidade.
Monte Cabalar: Cooperativismo e silvopastoralismo como instrumento de xestión do territorio
Fuco Xavier Barreiro Carracedo
Páx. 42 - 44
Monte Cabalar é unha cooperativa de explotación comunitaria da terra que agrupa aproximadamente 3.600 propiedades de máis de 1.000 propietarios nunha explotación gandeira en extensivo con máis de 700 Ha de monte fechadas nas parroquias de Somoza, Tabeirás, Nigoi, Arca e Souto (concello d’A Estrada) co obxectivo de intervir sobre o abandono e o minifundio. Coa introdución do primeiro rabaño de cabras o 15 de decembro de 2005 iniciouse unha experiencia de xestión do territorio que vai configurando a nova paisaxe “Monte Cabalar”.
.gif)
Avenida de Castelao, 20-Baixo 15704 Santiago de Compostela
Tlf/Fax: 981 570 099 Email:cerna@adega.gal
Edición: Ronda Fontiñas, 180 Entrechán. 27002 Lugo
Tlf: 982 240 299 Email: cerna@adega.gal